పలమనేరుకు స్వచ్ఛాంధ్ర అవార్డు 2026.. ప్రజా భాగస్వామ్యమే విజయానికి కారణం

పలమనేరు, అక్టోబర్ 2: పరిశుభ్రత, శాస్త్రీయ వ్యర్థాల నిర్వహణ, ప్రజల భాగస్వామ్యంతో పలమనేరు మున్సిపాలిటీ మరో ప్రతిష్ఠాత్మక గుర్తింపును సాధించింది. 50 వేల నుంచి లక్ష జనాభా విభాగంలో **“స్వచ్ఛాంధ్ర అవార్డు 2026”**ను పలమనేరు మున్సిపాలిటీ దక్కించుకుంది. విజయవాడలోని ఏ-కన్వెన్షన్ సెంటర్‌లో శుక్రవారం జరిగిన కార్యక్రమంలో ముఖ్యమంత్రి నారా చంద్రబాబు నాయుడు చేతుల మీదుగా ఈ అవార్డును అందుకున్నారు.

ఈ సందర్భంగా మున్సిపల్ కమిషనర్ కే. లోకేశ్వర వర్మ మాట్లాడుతూ, ఈ పురస్కారం కేవలం మున్సిపాలిటీకి లభించిన అవార్డు కాదని, పారిశుద్ధ్య కార్మికుల నిరంతర శ్రమ, పట్టణ ప్రజల బాధ్యతాయుత భాగస్వామ్యానికి దక్కిన గౌరవమని అన్నారు. పలమనేరు ఎమ్మెల్యే ఎన్. అమరనాథ్ రెడ్డి అందించిన నిరంతర ప్రోత్సాహం, మార్గదర్శనం విజయానికి కీలకంగా నిలిచాయని తెలిపారు.

పలమనేరు మున్సిపాలిటీలో 100 శాతం ఇంటింటా చెత్త సేకరణ, తడి-పొడి వ్యర్థాల వేర్పాటు వంటి కార్యక్రమాలను అమలు చేస్తున్నామని కమిషనర్ తెలిపారు. తడి వ్యర్థాలను కంపోస్ట్‌గా, పొడి వ్యర్థాలను రీసైక్లింగ్‌కు తరలించేలా శాస్త్రీయ విధానాలను అనుసరిస్తున్నామని చెప్పారు. ఏళ్లుగా పేరుకుపోయిన లెగసీ వ్యర్థాలను తొలగించి డంపింగ్ యార్డులను పరిశుభ్రం చేశామని పేర్కొన్నారు.

మురుగునీటి శుద్ధి కోసం ఎస్టీపీలు, ఈ-వ్యర్థాల ప్రత్యేక సేకరణ, RRR కేంద్రాలు, వేస్ట్ టు ఆర్ట్ కార్యక్రమాలను అమలు చేస్తున్నట్లు తెలిపారు. ప్రధాన, చిన్న డ్రైన్లను క్రమం తప్పకుండా డీసిల్టింగ్ చేయడంతో పాటు వర్షపు నీటి నిర్వహణపై ప్రత్యేక దృష్టి పెట్టినట్లు చెప్పారు.

“హరిత పలమనేరు” లక్ష్యంతో సామూహిక వృక్షారోపణ, పార్కుల అభివృద్ధి, ఇంటింటా కంపోస్టింగ్, మిద్దె తోటలను ప్రోత్సహిస్తున్నామని కమిషనర్ వివరించారు. పారిశుద్ధ్య కార్మికుల కోసం ప్రత్యేక వైద్య శిబిరాలు నిర్వహిస్తున్నామని తెలిపారు.

సింగిల్ యూజ్ ప్లాస్టిక్‌పై అవగాహన, జ్యూట్ బ్యాగుల వినియోగం, స్వచ్ఛతా హీ సేవా కార్యక్రమాలు, విద్యాసంస్థల్లో ర్యాలీలు, అవగాహన సదస్సులతో ప్రజలను స్వచ్ఛతా ఉద్యమంలో భాగస్వాములను చేస్తున్నామని చెప్పారు.

ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్, ఉన్నతాధికారులు, జిల్లా కలెక్టర్, స్వచ్ఛ ఆంధ్ర అధికారులకు కమిషనర్ కృతజ్ఞతలు తెలిపారు. ఈ అవార్డు తమ బాధ్యతను మరింత పెంచిందని, పలమనేరును రాష్ట్రంలో ఆదర్శవంతమైన ఆరోగ్యకర, హరిత పట్టణంగా తీర్చిదిద్దేందుకు మరింత కృషి చేస్తామని అన్నారు.