జైళ్లలో మొబైల్ వినియోగంపై కఠిన చర్యలు.. హోం మంత్రి అనిత ఆదేశాలు

అమరావతి సచివాలయంలో రాష్ట్ర హోం మంత్రి వంగలపూడి అనిత జైలు శాఖ అధికారులతో కీలక సమీక్ష సమావేశం నిర్వహించారు. రాష్ట్రంలోని జైళ్ల పరిస్థితులు, ఖైదీల భద్రత, జైళ్ల అభివృద్ధి, సంస్కరణలపై సుదీర్ఘంగా చర్చించారు. జైళ్లలో రద్దీ తగ్గించడం నుంచి ఖైదీల పునరావాసం వరకు అనేక అంశాలపై అధికారులకు కీలక ఆదేశాలు జారీ చేశారు.

నాన్-ఫంక్షనింగ్ జైళ్లపై ప్రత్యేక దృష్టి

రాష్ట్రంలో మొత్తం 106 జైళ్లు ఉండగా, అందులో 25 నాన్-ఫంక్షనింగ్ జైళ్ల వివరాలను ప్రత్యేకంగా జాబితా చేయాలని హోం మంత్రి అనిత ఆదేశించారు. ప్రస్తుతం ఉపయోగంలో లేని జైళ్లను మరమ్మతులు చేసి ఇతర జైలు కార్యకలాపాలకు వినియోగించే అవకాశాలపై నివేదిక సిద్ధం చేయాలని సూచించారు.

రాజమండ్రి, విశాఖ జైళ్లలో రద్దీ తగ్గించే చర్యలు

రాజమండ్రి మరియు విశాఖపట్నం జైళ్లలో అధిక రద్దీ ఉన్న నేపథ్యంలో, కొన్ని నాన్-ఫంక్షనింగ్ జైళ్లను పునరుద్ధరించి ఖైదీలను అక్కడికి తరలించే ప్రతిపాదనలు సిద్ధం చేయాలని అధికారులకు ఆదేశించారు. జైళ్లలో overcrowding తగ్గించేందుకు సమగ్ర కార్యాచరణ నివేదిక రూపొందించాలని పేర్కొన్నారు.

ప్రతి జిల్లాలో జిల్లా జైలు ఏర్పాటు లక్ష్యం

కొత్త జిల్లాల్లో కొత్త జిల్లా జైళ్ల స్థాపనపై ప్రతిపాదనలు ఇవ్వాలని మంత్రి స్పష్టం చేశారు. ప్రతి జిల్లాలో ఒక జిల్లా జైలు ఏర్పాటు చేసే దిశగా ప్రణాళిక రూపొందించాలని అధికారులను ఆదేశించారు. అలాగే భీమునిపట్నం జైలు కూల్చివేత అంశంపై పూర్తి నివేదిక ఇవ్వాలని, అవసరమైతే చట్టపరమైన చర్యలు చేపట్టాలని సూచించారు.

ఖైదీల పునరావాసం, డీ-అడిక్షన్ కేంద్రాలపై ఫోకస్

చింతపల్లి జైలు ప్రస్తుతం నాన్-ఫంక్షనల్‌గా ఉందని, ITDA నిధులతో పునరుద్ధరణ ప్రతిపాదనలు సిద్ధం చేయాలని మంత్రి తెలిపారు. జైళ్లతో పాటు Rehabilitation & De-addiction Centres ఏర్పాటు చేసే అవకాశాలపై నివేదిక ఇవ్వాలని ఆదేశించారు. ఖైదీలకు స్కిల్ డెవలప్‌మెంట్, ట్రైనింగ్ కార్యక్రమాలు నిర్వహించాలని చెప్పారు.

మొబైల్ వినియోగం, ఆత్మహత్యల నివారణపై చర్యలు

జైళ్లలో మొబైల్ ఫోన్ల వినియోగాన్ని నియంత్రించేందుకు NLJD పరికరాల వినియోగాన్ని పరిశీలించాలని మంత్రి సూచించారు. ఖైదీలు, సిబ్బంది ద్వారా మొబైల్ దుర్వినియోగాన్ని అరికట్టేందుకు కఠిన చర్యలు తీసుకోవాలని పేర్కొన్నారు. అలాగే జైళ్లలో ఆత్మహత్యల నివారణకు ప్రత్యేక చర్యలు తీసుకోవాలని, జైళ్ల నుంచి వీడియోలు బయటకు వెళ్లకుండా కట్టుదిట్టమైన భద్రతా చర్యలు అమలు చేయాలని ఆదేశించారు.

పెరోల్ ఖైదీలపై నిరంతర నిఘా

పెరోల్‌పై విడుదలైన ఖైదీల పూర్తి వివరాలు సేకరించాలని, వారి కార్యకలాపాలపై నిరంతర పర్యవేక్షణ ఉండాలని మంత్రి స్పష్టం చేశారు. జైళ్లలో Psychiatric Support అందించే విధానంపై కార్యాచరణ రూపొందించాలని చెప్పారు.

జైలు సంస్కరణలపై స్వల్పకాల, దీర్ఘకాల ప్రణాళికలను SOP ఆధారంగా రూపొందించాలని, జైళ్ల శాఖకు అవసరమైన కొత్త వాహనాలపై కూడా నివేదిక సిద్ధం చేయాలని హోం మంత్రి అనిత అధికారులకు ఆదేశాలు జారీ చేశారు.